ja_mageia

A Coruña, 25 de Abril do 2011.

O pasado 25 de Abril o Conselleiro de Presidencia, Administracións Públicas e Xustiza, D. Alfonso Rueda; a Conselleira de Traballo e Benestar, Dona Beatriz Mato; e o fiscal superior de Galicia, D. Carlos Varela, visitaron o centro de reeducación de menores “Concepción Arenal” da Coruña xestionado pola Fundación Camiña Social acompañados polo director do Centro, D. Javier Álvarez, e o coordinador xeral da Fundación, D. José Ignacio Mariño.

Durante a visita adiantaron que a Xunta de Galicia reforzará os equipos técnicos dos xulgados de menores de A Coruña e Pontevedra cun psicólogo a maiores en cada unha das cidades, co fin de potenciar a mediación xuvenil e aumentar, así, o número de solucións extraxudiciais entre os menores infractores.

Rueda precisou que a “gran maioría” dos menores que pasan por un proceso de mediación non reinciden, e engadiu que “o incremento das medidas de mediación é directamente proporcional á diminución de medidas a aplicar nos centros de menores”. O obxectivo marcado é lograr incrementar o número de solucións extraxudiciais entre os menores infractores a través da mediación. Fixo fincapé, ademais, nas vantaxes de dito proceso, destacando especialmente que esta vía dá unha resposta máis axeitada de cara á reeducación dos menores e logra, ao tempo, unha maior axilidade na xustiza de menores, ao reducir a saturación dos xulgados.

A Conselleira de Traballo e Benestar, Beatriz Mato, resaltou as actuacións que se desenvolven nestes centros específicos de reeducación e destacou o “importante” labor que se leva a cabo nestas instalacións para conseguir a reinserción social dos menores. Como exemplo, salientou que en 2010 ofrecéronse por primeira vez títulos oficiais a menores internos en centros de reeducación, a través dos cursos AFD da orde de formación para desempregados da Consellería de Traballo. Ditos cursos foron xestionados pola Fundación Camiña Social.

Mato valorou o labor que se leva a cabo con estes mozos e mozas, que reciben durante todo o seu internamento educación, orientación laboral e capacitacións profesionais, así como outras ferramentas de cara conseguir unha vida autónoma.

En concreto, referiuse ás accións formativas desenvolvidas ao abeiro do programa de obradoiros produtivos, que se desenvolve nos catro centros galegos financiado pola Consellería de Traballo e Benestar e xestionado por EIL INSERGAL, SLU.

Dentro deste proxecto, por primeira vez en Galicia, mozos e mozas privados de liberdade puideron ter un contrato de traballo nos obradoiros dos centros, e, como novidade tamén, os rapaces e rapazas tiveron acceso a becas de colaboración con distintas empresas para realizar prácticas.

Así, participaron en distintos cursos un total de 209 menores de todos os centros de Galicia; aos que se suman 12 que asistiron a actividades formativas fóra das instalacións; 18 que realizaron prácticas en empresas; e 58 que participaron en actividades de busca de emprego e orientación laboral.